हतारमा आत्मनिर्भर घोषणा, मासुजन्य पशुपन्छीको आयात भने बढ्दो

काठमाडौं ।नेपाललाई मासुजन्य पशुपन्छी उत्पादनमा आत्मर्निभर घोषणा गरिए पनि आयात भने वर्षेनी बढ्दै गएको छ ।गत महिना मात्रै प्रधानमन्त्री केपी शर्मा ओलीले नेपाल पशुपन्छीमा आत्मनिर्भर भएको घोषणा गरेका थिए । उनले ‘पशुपन्छीजन्य उत्पादनमा मुलुक आत्मनिर्भर’ उल्लेख गरे पनि भन्सार विभागको तथ्यांकले भने वर्षेनी आयात बढेको देखाएको छ ।

भन्सार विभागकै तथ्यांक अनुसार चालू आर्थिक वर्षको ८ महिना (साउन–फागुन)मा १ अर्ब १० करोड ६४ लाख रुपैयाँ बराबरको मासुजन्य जिउँदो जनावर आयात गरिएको छ । सो मूल्य बराबरको ९ लाख ५ हजार वटा पशुपन्छी आयात भएका छन् ।

सो अवधिमा १ अर्ब रुपैयाँ बराबरको मात्र कुखुराका चल्ला आयात भएका छन् । उक्त रकममा ८ लाख ९४ हजार वटा कुखुराका चल्ला आयात भएका हुन् ।

यस्तै, ७ करोड ४४ लाख रुपैयाँ बराबरको खसी आयात भएको भन्सार विभागको तथ्यांकले देखाएको छ । सो रकममा १० हजार १५० वटा खसी आयात गरिएको हो । साथै १ अर्ब १७ करोड रुपैयाँको माछा र १ अर्ब ३३ करोड रुपैयाँको डेरी उत्पादन आयात भएको विभागको तथ्यांकले देखाएको छ ।

यस अघि गत आर्थिक वर्ष २०७६/७७ को ८ महिनामा ९३ करोड ३९ लाख ५२ हजार रुपैयाँ बराबरको जिउदा पशुपन्छी आयात भएको थियो । सो अवधिमा सरकारले १० लाख २९ हजार वटा जिउँदो जनावर भित्राएको थियो ।

गत वर्ष ७७ करोड रुपैयाँ बराबरको मात्र कुखुराका चल्ला आयात भएका थिए । सो मूल्य बराबरको १० लाख १६ हजार वटा कुखुराका चल्ला आयात गरिएका थिए ।यस्तै खसी १२ करोड २० लाख रुपैयाँ बराबरको १० हजार २९२ वटा आयात भएको थियो । साथै भेडा १ करोड २५ लाख रुपैयाँ बराबरको २ हजार २११ वटा आयात भएको थियो ।

गत आर्थिक वर्षमा कुल ९५ करोड ५७ लाख रुपैयाँ बराबरको जिउदो पशुपन्छी आयात भएका थिए । सो मूल्यमा १० लाख ६१ हजार वटा बढि पशुपन्छी आयात भएका थिए ।

सो वर्ष कुखुराका चल्ला ७९ करोड २१ लाख रुपैयाँ बराबरको १० लाख ४८ हजार वटा आयात गरिएको भन्सार विभागको तथ्यांकले देखाएको छ । यस्तै सो वर्ष १२ करोड रुपैयाँ बराबरको १० हजार वटा खसीबोका आयात भएका थिए । साथै १ करोड २५ लाख रुपैयाँ बराबरको २ हजार २ सय ११ वटा भेडा आयात भएको थियो ।

Related Posts