नयाँ वर्षमा नयाँ गाडी

अटोबजार पुरानै लयमा फर्किन थालेपछि केही कम्पनीले नयाँ गाडी ल्याएर बिक्री सुरु गरिसकेका छन् भने कतिपयले ल्याउने तयारी गरिरहेका छन् 

नयाँ वर्ष नजिकिँदै जाँदा मुलुकको अटोबजार पनि गर्माउन थालेको छ । अटो व्यवसायीहरू नयाँ मोडलका गाडी भित्र्याएर ग्राहक आकर्षित गर्न जोडतोडले लागेका छन् । कोभिड–१९ को त्रास कम भएसँगै गाडीको माग बढ्न थालेपछि व्यवसायीहरू नयाँ प्रतिस्पर्धी गाडी भित्र्याउन कस्सिएका हुन् ।

नयाँ वर्षको सुरुवातसँगै अटोमोबाइल बजारले पनि गति लिने किया गाडीका विक्रेता कन्टिनेन्टल इन्टरप्राइजेजका अध्यक्ष सुहृद घिमिरेको अनुमान छ । एक वर्षसम्म सुस्ताएको अटोमोबाइल बजारले पछिल्ला महिनामा लय समातिसकेको छ । मोटरसाइकल तथा स्कुटरको बिक्री गत साउनदेखि नै लयमा फर्किएको थियो । दसैँ–तिहारपछि कारको माग पनि बिस्तारै बढेर अहिले कोभिडअघिकै अवस्थामा फर्किसकेको व्यवसायीको भनाइ छ ।

अटोबजार पुरानै लयमा फर्किन थालेपछि केही कम्पनीहरूले नयाँ गाडी ल्याएर बिक्री सुरु गरिसकेका छन् भने कतिपयले ल्याउने तयारी गरिरहेका छन् । दसैँपछि सर्वाधिक गाडी बिक्री हुने सिजन पनि हो नयाँ वर्ष । नयाँ वर्षमा कम्पनीहरूले बम्पर उपहार, नगद छुटसहितका आकर्षक स्किमहरू ल्याउने गर्छन् । यही वेला झन्डै एक दर्जन कम्पनीहरूले नयाँ मोडलका गाडी ल्याएर बिक्री सुरु गर्दै छन् । तर, अहिले खरिदकर्ता भेटिँदा पनि कोभिडका कारण अन्तर्राष्ट्रिय बजारमै गाडीको उत्पादन र वितरण शृंखला बिग्रिँदा विक्रेताहरूले ग्राहकलाई बुकिङ गरेको गाडी पनि समयमा दिन सकेका छैनन् ।

‘गाडीको व्यापारमा बैंकको तरलता र राजनीतिक अवस्थाले धेरै भूमिका खेल्छ,’ घिमिरेले भने, ‘अहिले राजनीतिक अवस्था सहज नभए पनि बैंकिङ प्रणालीमा पर्याप्त तरलता भएका कारण गाडीको बिक्री पक्कै बढ्नुपर्ने हो ।’ अहिले गाडीको माग नभएको होइन, विक्रेतालाई समयमा गाडी हस्तान्तरण गर्न नसक्नु मुख्य समस्या बनेको छ । ‘यो आर्थिक वर्षभरि गाडीको सप्लाई सहज हुने देखिँदैन, साउनदेखि गाडीको उत्पादन बढ्ने र सप्लाई चेन पनि लयमा फर्किएला,’ उनले थपे ।

यस्ता छन् नयाँ गाडी
पायोनियर मोटोकर्पले हालै निसानको म्यागनाइट कार नेपाल भिœयाएको छ । एक हजार सिसीको निसान म्यागनाइट बिग, बोल्ड, ब्युटिफुल र करिज्माटिक भएको कम्पनीका प्रबन्ध निर्देशक सन्दीपकुमार सारडाको भनाइ छ । आकर्षक डिजाइनमा रहेको म्यागनाइट ग्राहकमाझ लोकप्रिय भइसकेको छ । करिब एक दर्जन भेरियन्टमा उपलब्ध म्यागनाइटको मूल्य २९ लाख ४९ हजारदेखि ४२ लाख ७९ हजारसम्म छ । ग्राहकको चाहनाअनुरूप आकर्षक डिजाइन र उच्च प्रविधि प्रयोग गरिएको हुँदा म्यागनाइट नेपाली अटो बजारमा गेमचेन्जर बन्ने कम्पनीको विश्वास छ ।



कोरियन कम्पनी कियाले सबकम्प्याक्ट एसयुभी गाडी सोनेट हालै नेपाल भिœयाएको छ । कियाको नेपाली विक्रेता कन्टिनेन्टल ट्रेडिङ इन्टरप्राइजेजले ल्याएको सोनेटले छोटो अवधिमै नेपालीको विश्वास जित्न सकेको छ । आकर्षक डिजाइन र उत्कृष्ट फिचरका कारण सोनेट लोकप्रिय बन्न सकेको हो । सोनेट ३ वटा डिजेल र एउटा पेट्रोल गरी ४ वटा भेरियन्टमा उपलब्ध छ । पेट्रोल भेरियन्ट १२ सय सिसी र डिजेल भेरियन्ट १५ सय सिसीमा रहेको सोनेटको मूल्य ३५ लाख ९० हजारदेखि ५७ लाख ९० हजारसम्म रहेको छ । यसमा १०.२५ इन्चको एचडी इन्फोटेन्मेन्ट, ६ वटा एयरब्याग, एबिएस, ब्रेक असिस्ट, हिल स्टार्ट असिस्ट कन्ट्रोल, भेहिकल स्टाबिलिटी म्यानेजमेन्ट, ७ वटा स्पिकर, एलइडी ल्याम्पलगायत दर्जनौँ विशेषता रहेका छन् ।



हालै मात्र डिएफएसकेको एडभान्स सिरिज ग्लोरी आई–अटो नेपाली बजारमा भित्रिएको छ । डिएफएसकेको नेपाली विक्रेता कुजु नेपाल प्रालिले ग्लोरी आई–अटो कम्प्याक्ट एसयुभी कार भिœयाएको हो । ग्लोरी आई–अटो इन्टेलिजेन्स एसयुभी गाडी हो, जसमा रहेका धेरै फिचरहरू भ्वाइस कमान्डबाटै चलाउन सकिन्छ । यसले ७ सिटर इन्टेलिजेन्स एसयुभीको उपमा पनि पाएको छ । १.५ लिटर टर्बो चाज्र्ड पेट्रोल इन्जिन रहेको यो गाडी अटोमेटिक गियरबक्समा आएको छ । पानारोमिक सनरुफ तथा रुफ रेले ग्लोरी आई–अटो स्पोर्टी देखिन्छ । यसको मूल्य ८९ लाख ५० हजार तोकिएको छ ।



ब्रिटिस मोटर कम्पनी मोरिस ग्यारेज (एमजी) को नयाँ एसयुभी ‘एचएस’ नेपाली बजारमा भित्रिएको छ । एसयुभी एचएसमा १.५ लिटर टर्बो इन्जिन रहेको छ । ७ स्पिड डिसिटी गियरबक्स भएको यस गाडीमा सुरक्षाका लागि ६ वटा एयरब्याग, एबिएस, इबिडी, इएससी, इलेक्ट्रोनिक ब्रेक असिस्टलगायत फिचर राखिएका छन् । यो गाडीमा ३६० डिग्री क्यामरा जडान गरिएको छ, जसको सहयोगले साँघुरो बाटोमा पनि सजिलै गाडी कुदाउन सकिन्छ । गाडीको अगाडि र पछाडिका चारै चक्कामा डिस्क ब्रेक, एन्टी ट्र्यापसहितको पानारोमिक सनरुफलगायत फिचर पनि छन् । कारमा १०.१ इन्चको इन्फोटेन्मेन्ट सिस्टम रहेको छ । नेपाली बजारमा एमजी एचएसको मूल्य ७९ लाख ९९ हजार रुपैयाँ तोकिएको छ ।



सैन्य पृष्ठभूमिबाट उदाएको एसयुभी ब्रान्ड जिप कम्पासको अपग्रेडेड भर्सन पनि नयाँ वर्षमा सार्वजनिक गरिँदै छ । तीन वर्षअघि नाडा अटो सोमा सार्वजनिक भएको कम्पास क्यापाबिलिटी र बिल्ड क्वालिटीका कारण नेपालमा निकै रुचाइएको छ । नयाँ वर्ष पारेर नेपालमा सार्वजनिक हुन लागेको एसयुभी कम्पासको चौथो पुस्ता हो ।

नयाँ पुस्ताको कम्पासमा ५० सुरक्षा फिचर, ३० प्रिमियम फिचर र २० पायोनियरिङ टेक्नोलोजी हुनेछन् । नयाँ कम्पास स्पोर्ट, लंगिच्युड, लिमिटेड र एस मोडेलमा १.४ लिटर मल्टिएयर पेट्रोल र २.० लिटरको मल्टिजेट टर्बो डिजेल इन्जिनमा उपलब्ध हुनेछ । वायरलेस चार्जिङ, ३६० डिग्री क्यामरा, १०.२५ इन्चको ड्राइभर इन्फर्मेसन डिस्प्ले, १०.१ इन्चको इन्फोटेन्मेन्ट सिस्टम, भेन्टिलेटेड फ्रन्ट सिट, ८ वे पावर सिट, इलेक्ट्रोनिक टेलगेटजस्ता प्रिमियम फिचरहरूले कम्पास सुसज्जित हुनेछ । नयाँ कम्पासको मूल्य ८३ लाख ९० हजारदेखि १ करोड ३६ लाख ९० हजार रुपैयाँसम्म हुनेछ ।



नयाँ वर्षमा रेनोको चर्चित मोडल काइगर नेपाली बजारमा भित्रिँदै छ । रेनोको नेपालका लागि आधिकारिक विक्रेता एडभान्स अटोमोबाइल्सले वैशाखमा कम्प्याक्ट एसयुभी काइगर सार्वजनिक गर्ने तयारीमा छ । १.० लिटर टर्बोचाज्र्ड पेट्रोल इन्जिन रहेको काइगरको ५ स्पिड गियर बक्समा उपलब्ध छ । एडभान्स अटोमोबाइल्सले काइगर नेपाल भित्रिँदा कति मूल्य पर्छ भनेर अझै सार्वजनिक गरेको छैन ।



कोभिडकै बीचमा नेपाली बजारमा रि–इन्ट्री गरेको मलेसियन ब्रान्ड प्रोटोनले एसयुभी मोडल एक्स ७० वैशाखमा सार्वजनिक गर्दै छ । शंकर ग्रुपअन्तर्गतको जगदम्बा अटोमोबाइल्सले प्रोटोनलाई पुनः नेपाली बजारमा भिœयाएको हो । कम्पनीले सुरुमा सेडान भेरियन्ट साँगा सार्वजनिक गरेको थियो । यसले नेपालमा एसयुभी जिप, टक्सन, स्पोर्टेज गाडीसँग प्रतिस्पर्धा गर्नेछ । प्रोटोन एक्स ७० १.५ लिटर टर्बोचाज्र्ड थ्री सिलिन्डर पेट्रोल इन्जिनमा उपलब्ध हुने बताइएको छ । ७ स्पिड डिसिटी ट्रान्समिसन भएको यो गाडी टू ह्विल ड्राइभ र फोर ह्विल ड्राइभमा उपलब्ध हुनेछ । यसमा ६ वटा एयरब्याग, एबिएस विथ इबिएस, ३६० डिग्री क्यामरा, ८ स्पिकर, ८ इन्चको इन्फोटेनमेन्ट सिस्टम, क्लाइमेट कन्ट्रोल विथ स्मार्ट एयर प्युरिफायर सिस्टमलगायत दर्जनौँ फिचरहरू राखिएका छन् । कम्पनीले अझै नेपाली बजारमा एक्स ७० को मूल्य सार्वजनिक गरेको छैन ।

Related Posts

Leave a Reply

Your email address will not be published. Required fields are marked *